منتدى هوات الخشبة

عالمك الخيالي هنا
 
دخولس .و .جبحـثالتسجيلالأعضاءالمجموعاتالرئيسية

شاطر | 
 

 مسرحية رايس ليلة 3

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
Admin
{{}} المدير {{}}
{{}} المدير {{}}


المساهمات : 32
تاريخ التسجيل : 02/01/2008
العمر : 28
الموقع : khachaba.mam9.com

مُساهمةموضوع: مسرحية رايس ليلة 3   الأحد فبراير 10, 2008 10:03 am

-جويليلي: (لحميدة) ملِّي نتعشَّاوا سير انت عيَّط على مِّي.. يالله أنافا.. حبس.. أنافا.. حبس.. أنافا..
(يهجمون على وعاء الطعام على شاكلة الكلاب الضالة، تحت ضحكات الحاج بوعزَّة ولمقدَّم)
-حميدة: سير أودِّي أ الرَّايس كرمتنا في هاد اللِّيلة.. سير الله إكرمك ع دوام.. گولو آمين
-الجوقة: آمين.. أمين.. أمين
-حميدة: سير الله إخليك ديما رايس تَّاكل وتوكَّل
-الجوقة: آمين.. أمين.. أمين
-حميدة: وسير يا حميدة الله إخليك ديما نايب تَّاكل ما توكَّل
-الجوقة: آمين.. أمين.. أمين
-حميدة: سير الله إدوَّمها علينا نعمة.. بلا خدمة، بلا ردمة
-الجوقة: آمين.. أمين.. أمين
(13)
-حميدة: ها مُّك جات أ الرَّايس
-هنيَّة: (تظهر) هو فين هو هاد لمسيخيط؟ هو فين هو هاد القرد؟
-لمقدم: سيري برِّي على لقرودة في التِّساع.. وبارك من تهوبيل يا هاد الجَّحمومية
-جويليلي: وا مِّي.. هانا هنا.. هانا هنا
-هنيَّة: أنت هنا يا بو دعايق.. ياك أدعاوي لبلا.. داير راسك فراجة ومصيفط لي؟ گول لمِّي تجي تشوفني.. آش غادي نشوف فيك؟
واش هاد شِّي لابس؟
-جويليلي: هادي أمِّي السَّلهامة ديال تريَّاست
-هنيَّة: ديال الحاج بوعزَّة ياك؟.. ضحك عليك بها.. يالله نصلها ولوحها له في وجهو
-حميدة: وا الرَّايس.. تيگول لك بويا أمَّك عندها الحق.. الرَّاجل راجل بحنادرو.. ماشي بحنادر غيرو..
-هنيَّة: يالله نوض دگعَّد من هنا.. يالله نوض.. واش كتسمع ولاَّ لاَّ؟ نوض حيَّد من هنا
-حميدة: خلِّيه أخالتي هنيَّة گاعد.. عيب عليك ضَّيعيه في تريَّاست هاد اللِّيلة
-هنيَّة: وانت مالك أ لقرع.. أش حرگ شطاتَّك؟
-حميدة: حيت ما دام هو الرَّايس أنا النَّايب ديالو
-هنيَّة: نايب.. سير الله إعطيك ما ينوبك لا انت لا هو.. هو رايس.. وانت نايب.. الله إعطيكم أ الدَّل بجوج.. داروكم قرودة باش إضحكو
عليكم؟
-حميدة: واش ندِّيها للحبس أ الرَّايس؟
-هنيَّة: ياك أجويليلي دلِّيت راسك.. ودلِّتينا معاك.. ولِّيت سوليما ياك؟
-حميدة: خالتي هنيَّة.. گال لك بويا..
-هنيَّة: أش غادي إگول لي بوك؟.. غادي إگول لي ما تبكيش على التَّرِّيكة العوجة؟
-حميدة: لاَّ گال لك بقاي تبكي.. تبكي.. تبكي حتَّى يتفش گلبك فشَّة لِّي ما عمرو يتَّنفخ من بعدها خالدين أبدا
-هنيَّة: گول لبوك يدِّيها غير في الجِّهة لِّي ضرَّاه.. كلشي تَّكوانسى فيه.. ما بقى خدَّام فيه غير الدَّرقوش.. گع نهار أهو بَرْ بَرْ بَرْ بحال شي
راديو خاسر.. الله يبقِّي ستر.. ما خلاَّ لنا حنايا لعيالات ما نگولو..
(14)
-عويشة: (تظهر) ها ها هها هها هها.. ببيبوه.. ببيوه.. ببيوه.. وامشيت تهنِّيت وخلِّيت غَ صَّگعين واحلين.. ها ها هها هها هها
-عبد السلام: شكون لِّي مات أبنتي.. شكون؟
-عويشة: الناس تيبكيوا ع الميتين.. ونا نبكي ع الحيِّين.. ها ها هها هها هها
-عبد السلام: وانت گولي لي شكون لِّي مات أعويشة؟
-عويشة: البگرة أبويا.. البگرة.. ها ها هها هها هها
-عبد السلام: البگرة.. دارتها هاد المرَّة؟
-عويشة: واه أبويا واه.. ها ها هها هها هها.. صافي هدي هي اللَّخرى لنا.. ها ها هها هها هها.. فين كان مخزون لنا گع هاد شِّي؟ ها ها
هها هها هها
-عبد السلام: الله الله أربِّي.. أش ندير داب يا ربِّي؟ نتساهل العقوبة..
-حميدة: كلنا لها أعمِّي عبسلام.. فين هو عواج بن عناق؟ فين هو عنترة بن شدَّاد؟ فين هي فاطنة بنت الحسين؟ ما بقات غ بگرتك!!
-عبد السلام: نتساهل نمشي للحبس..
-حميدة: ما تيشدُّو لقنات غير الكبَّبات أودِّي أعمِّي عبسلام
-عبد السلام: نغرق تحت لارض حتَّى نرشى.. أنا لِّي دَّاوني هاد ركابي العوجين عندو نهار اللَّوَّل باش نتسلَّف.. راه ما كيتسلَّف غير التَّالف بحالي..
-حميدة: هدي كاينة.. والله العظيم إلى كاينة
-عويشة: ولمَّن غادي تخلِّني أنا أبويا؟ ما عندي حد من غيرك
-جويليلي: وعلاه فين مشيت أنا أعويشتي؟
-عويشة: سير خلِّني عليك في التِّقار أجويليلي.. واش أنا داب غير فيك؟
(مقطع غنائي)


بگرتي الصَّفرة زينة لبگر
حلاَّبة فكل لوقات والناس تحلب غ لفجر
بسمنها عمَّرت گلالي سالو ولاد عمامي وخوالي
ما خلاَّ اللَّوَّل والو لتَّالي غا رجا في الله العالي
اليوم وفى العمر وخلاَّتني عليها لاَّلي
هاد زمان زاد خسر تريَّشنا وكزِّينا بالصَّر
-حميدة: عمِّي عبسلام.. البركة في راسك.. راه ما يدوم غير وجه الله سبحانه.. هدي هي الدَّنيا أعِّمي عبسلام.. شي غادي وشي جاي..
ما خصش الواحد إربِّي عليها الكبدة گع.. ديك النُّوبة عاد گال لنا الفقيه.. راك كنت حاضر معانا أعمِّي عبسلام.. بلِّي الدَّنيا ما
تسواش عند ربِّي حتَّى جناح بعوضة.. هدا ربِّي گع.. ما حسبلاَّك حنا بنو أدام.. إوا حضَّر عقلك أعمِّي عبسلام.. ورا ما بقى گدَّامك
درك حتَّى حل من بعد موت المرحومة.. الله إجعلها صدقة في الميزان المقبول للكلاب يشبعو فيها هاد اللِّيلة سوى دِّير داك شِّي
لِّي بغى منَّك الحاج بوعزَّة.. وتفك عليك هديك الرَّبگة اللِّي في عنگك.. إوا آش باقي تتسنَّى أعمِّي عبسلام؟
(15)
-جويليلي: أنا غادي نحل لكم هاد القضيَّة بمعرفتي أعويشتي.. عمِّي الحاج
-الحاج بوعزَّة: أش كاين أجويليلي؟
-جويليلي: ياك حنا تَّفقنا على لِّي نطلبو يتنفَّد.. ياك؟
-لمقدَّم: أش بغيت تعني أجويليلي؟؟؟
-جويليلي: أنا عندي واحد الطَّلب أعمِّي الحاج
-الحاج بوعزَّة: بحالاش أجويليلي؟
-جويليلي: أنا بغيتك تشرَّگ هديك الورقة اللِّي حط لك عليها عمِّي عبسلام صبع
-لمقدَّم: لاَّ لاَّ.. هدا تعدَّى خرجان لعقل لهيه
-الحاج بوعزَّة: يالله نوضو كاملين سيرو درگو عليَّ كمامركم
-جويليلي: شفتو أعباد الله.. هاهو رجع في كلامو
-الحاج بوعزَّة: واش تسكت أجويليلي ولاَّ لاَّ؟
-جويليلي: كفاش نسكت؟ واش سمعتو أعباد الله گال لي سكت.. واش هدا معقول؟
-هنيَّة: ياك أ الحاج هما عسيلة على سمينة ملِّي إضحكوك؟ وداب ما عجبنكش.. بغيتهم إمشيوا
-جويليلي: ياك نتما شاهدين أعباد الله؟ الحاج بوعزَّة رجع في كلامو.. گال لي لِّي تطلبو يتنفَّد.. كاين هاد شِّي ولاَّ لاَّ؟
-حميدة: كاين.. والله إلى كاين أ الرَّايس
-لمقدَّم: يالله نمشيوا في حالنا أ الحاج.. ونفضِّيوا هاد لحريرة الجَّارية
-الحاج بوعزَّة: كفاش نمشيوا أ لمقدَّم؟
-لمقدَّم: باش نهنِّيوا روسنا من هاد صداع الخاوي
-الحاج بوعزَّة: راه إلى مشينا داب.. ما عمَّرنا غادي نعرفو نهدرو مع هاد جلاخات
-لمقدَّم: ياك هاد شِّي لِّي..
-الحاج بوعزَّة: سكت انت أ لمقدَّم
-حميدة: الحاج بوعزَّة.. گال لك بويا الرَّاجل هو الكلمة
-الحاج بوعزَّة: گول لبوك إنوض إدرَّگ عليَّ خنشوشو
-جويليلي: حميدة النَّايب
-حميدة: نعم أ الرَّايس
-جويليلي: سير جيب لي الحاج بوعزَّة
-الحاج بوعزَّة: والله ونشدَّك أولد الحرام.. حتَّى نسلخ جلدك على عظمك
-لمقدَّم: وملاغة كتيرة هدي أ الحاج!!
-حميدة: عرفت أش گال لي بويا أ الرَّايس؟ گال لي غير تمشي ولاَّ رانا ساخط عليك دنيا وآخرة
-جويليلي: إوا يالله سير خلاص أحميدة
-حميدة: واقيلا هدا تهرنيط حمار لفقيه وصل أ الرَّايس..
-جويليلي: لفقيه وصل؟
-حميدة: تفو على زهر.. اللَّعب كمل أ الرَّايس
-جويليلي: طل.. طل أحميدة شوف هاد نص فقيه واش لحگ؟
-حميدة: مازال قبُّو ما باين لي أ الرَّايس
(16)
-جويليلي: وامِّي
-هنيَّة: نعم أوليدي جويليلي
-جويليلي: أجي خلاص گولي للنَّاس على لِّي معدَّب ختي رحيمو.. على لِّي مطيَّر لها نعاس من عينيها..
-هنيَّة: تا تكون راگدة ما عليها ما بها.. حتَّى كتقفز من نعاس وكتنوض كتغوَّت وكتنتف في شعكاكتها گع اللِّيل وما طال..
-عويشة: يالله هدري أمِّي هنيَّة.. علاش كتهدري أمِّي هنيَّة غير في ودنيه علاش؟ حتَّى لين غاديين نبقاوا حابسين الهدرة في جوفنا.. بين لفَّام
والودنين؟ فكُّوا رباطها.. إتفك رباطنا.. وصفا حالنا من كل عفن..
-لمقدَّم: وا قيلا هدي ركبها شي جن
-عويشة: عندك الصَّح أودِّي أ لمقدَّم يا عوج لگدم.. إيِّيه أنا راكبني جن.. وسليماني.. اليوم غادي يخرج ويهدر بلساني
-هنيَّة: بسم الله عليك أبنيتي.. أنت في عار الله.. سيري زمِّي فمَّك وشدِّي لارض
-جويليلي: خليها تهدر أمِّي
-حميدة: وها هي هدرت.. أش غادية تگول أجويليلي؟
-عويشة: غادية نگول لِّي ما گد إگولو حتَّى رويجل فيكم هنا..
-حميدة: دوزي أعويشة هزِّي بويا.. ويالله نمشيوا فحالتنا.. ما عدنا ما نديرو بهاد صداع الخاوي
-عويشة: خاوي عندك انت.. أمَّا أنا عندي عامر حتَّى لزنافر.. علاش أحميدة ما تهدرش وتگول لهم بلِّي هداك الحاج بلا حج هو لِّي
زحَّف بوك بالغبينة.. وخلاَّه عادم مليوح في ركينة؟


(17)
(رجع)
-المعطي: شحال تعطني في البهيمة أ لمقدَّم؟
-لمقدَّم: راه گلت لك ميا وعشرين ألف.. والله ما نزيدك عليها شي فرنك أمعيطي.. وراه في خبارك بلِّي راه ما كاينش لِّي قدر إساومك
عليها من غيري أنا في السُّوق.. إوا سير دِّيها رجَّعها، وخلِّيها حتَّى تخلَّعها..
-المعطي: وا سِّي الحاج.. هدر لي مع لمقدَّم يزيدني شويَّة.. واش هديك لبهيمة ديال ميا وعشرين ألف!!
-الحاج بوعزَّة: إوا أش باغي أمعيطي تكدَّد ولاَّ أشنو؟ سير شد جطَّك وگول الله إربَّح وجعل البركة
-لمقدَّم: هاك أمعيطي ها ستِّين ألف ديالك.. يالله زيد اعطني بصفايح رجليك
-الحاج بوعزَّة: تالين لحَّگت لبهيمة أ لمقدَّم؟
-لمقدَّم: ميا وستِّين ألف أ الحاج
-الحاج بوعزَّة: صافي!! أرا لي رزقي
-لمقدَّم: هاك أ الحاج ها ميات ألف ديالك.. بالصَّحة والرَّاحة
-الحاج بوعزَّة: هاك شد هاد البركة.. والمرَّة جَّايَّة نبغيك تزيد تزيَّر لي القضيَّة شويَّة
-لمقدَّم: من هاد الجِّهة غير كون هاني أ الحاج.. الله إخلف وقوِّي عليك الخير..
-المعطي: كفاش نصِّي أنا قل من نص الحاج بوعزَّة؟؟؟؟
-لمقدَّم: حيت نصَّك ماشي بحال نصُّو
-الجوقة: حيت نصَّك ماشي بحال نصُّو
-المعطي: ياك نصوصة گع بحال بحال؟؟؟ حساب أش من گنس هدا؟؟؟؟
-لمقدَّم: ها لِّي خصُّو لمقص أ الحاج.. يتحش له به لسان وركابي..
-المعطي: اللَّهمَّ إنَّ هدا منكر.. والله تا نفضحكم في الدَّوَّار
-الحاج بوعزَّة: واش تسكت ولاَّ لاَّ؟ أرا لمقص أ لمقدم
-لمقدَّم: هو اللَّوَّل أ الحاج
(18)
-عويشة: وزيد گول لهم أحميدة را حتَّى أنا باغي يتعدَّى عليَّ إلى عتَّبت لدارو باش نخدم.. باش نحيَّد على بويا الله إسمح له الهم..
-هنيَّة: بالحق ما شي غير رحيمو بنتي لِّي دار معاها داك شِّي.. گع لبنات لِّي خدمو عندو دار معاهم داك شِّي.. إوا لكدوب حرام ما
يبغيه لاربِّي لا عبدو..
-جويليلي: سمعتو أعباد الله.. ها الحاج ديال القصَّات ولخرايف.. وگعدات الضَّحك والبسط.. هدي رها ماشي قصَّة ختي رحيمو وصافي..
هدي رها قصَّة گع لبنات لِّي دخلو لدارو.. ولِّي غاديات إدخلو لها..
-الحاج بوعزَّة: كلب.. كلاب
(19)
(رجع: يتم فيه تشخيص عملية اغتصاب الحاج بوعزَّة لهنيَّة)
(20)
-عويشة: وزيد گولي لهم تاني أمِّي هنيَّة باللِّي را هو لِّي فرض على حميدة باش تجوَّج ببنتك رحيمو..
-حميدة: صافي أعويشة صافي بارك.. (لاَّبيه) وحتَّى انت أبويا ما عندك ما تگول لي.. أنا أكبر لمساخيط وما عمر هاد الشَّقفة ديال راسي
تنوَّض زغب.. صافي هنيتو داب بجوج؟
-جويليلي: هي إمتى تجوجت اختي بك أحميدة؟ گع هاد شِّي طاري أمِّي ونا ما جايب له خبار؟ مكفيَّة عليَّ زگاوة ياك؟؟؟
-هنيَّة: هاد شِّي علاش كنت كتقلَّب أجويليلي.. تفضح اختك.. على شان عويشة وبوها؟
-جويليلي: لاَّ أمِّي.. على شان گع بنات الدَّوَّار
-هنيَّة: حيت ما قدرتش تواجهو الرَّاس بالرَّاس.. تنوض تفضح اختك.. وتخلِّي قصَّتها على كل لسان؟
-جويليلي: واش كنت بغيتني ندير أمِّي؟ نگطع له راسو؟
-حميدة: وتگد أ الرَّايس تگطع له راسو؟!
-لمقدَّم: يالله نمشيوا أ الحاج خلاص.. واش بغيت دِّير راسك في هاد شمايت؟
-عويشة: فين غادي إمشي؟ ما عندو فين إمشي هاد اللِّيلة.. غير لقبرو (تخرج سكيناً من تحتها، وتهجم على الحاج بوعزَّة)
-عبد السلام: وانت لعني الشِّيطان أبنتي.. لعني الشِّيطان لحرامي.. الله إلعنو وخزيه..
-عويشة: ما كاينش شي شيطان گد هدا أ بويا
-هنيَّة: وانت حضري عقلك أبنيتي گبل ما دِّيري شي مصيبة
-جويليلي: هيتي على بوه أعويشتي هيتي.. ديري له شي غار في گنازتو إموت ما ينساه.. لمرا عندي فحلة أحميدة..
-لمقدَّم: وحتَّى انت أجويليلي ما خلِّيت من لفحولية والو لُّخراين
-الحاج بوعزَّة: سير عيَّط انت أهداك المجراب على الجَّدارمية إجيوا إدِّيوا هدي إقوسنوها.. وهنِّيونا منها.. يالله سير آش باقي كتسنَّى؟
-حميدة: اللَّولى، أنا ماشي مجراب.. أنا غير قرع.. وزيدون أنت اللِّي جربت گع الدَّوَّار.. والثانية، كنت غالط فيك.. كنت كنسحابك واحد الرَّاجل نميرو واحد.. سعَّ انت واحد ولد الحرام مگطَّع.. والثالثة، حتَّى يطيح الدَّم ونشوفوه بعينينا عاد نمشيوا نعيطو على الجَّدارمية.. ونعرفو ديك السَّاعة علاش مشينا عندهم..
-الحاج بوعزَّة: حتَّى انت أ المجراب تحل لك الدَّرگوم؟ مزيان والله إلى مزيان!! باغي تمشي تشد الركنة بحال بوك..
-لمقدَّم: (لعويشة) سيري شدِّي لارض ورصاي.. ولاَّ غادي نگول لهم على لفضيحة اللِّي درت ديك اللِّيلة مع جويليلي..
-عويشة: كاينة شي فضيحة كبر من هدي لِّي دايرين نتما في هاد الدَّوَّار؟
-لمقدَّم: سيري عطنا التِّساع.. را سيدي مهاوش فين هو سيري باتي فيه إلى ناض فيك الحال.. راك تتقلبي على الحبس دُّخلي له برجليك
أعويشة..
-عويشة: ياك أنا غير مصطية.. ما عندهم فين إدِّيوني غير لبرشيد.. اليوم غادي نشرب من دمَّك.. ونلحس عظمك.. اليوم أبوخنز اليوم..
بي ولاَّ بك.. (يتدخل لمقدَّم، فيأخذ منها السكين)
-لمقدَّم: باغية تقتلي الحاج بوعزَّة ياك أعويشة؟ گع هاد شِّي وصلنا له؟
-الحاج بوعزَّة: وخَّ.. أنا غادي نعرف أش ندير معاكم يا جماعت البعوض
(21)
-جويليلي: شوف أحميدة شوف هديك العلامة لِّي عند الحاج بوعزَّة في دراعو ليسر.. ياك هي لِّي عندي في نفس دراع حتَّى أنا!!
-حميدة: وا علامة وحدة أ الرايس!! سبحان الله!! ما تقدرش تفرَّق بين هدي وبين ديك.. گع كحلات مسقَّم بجوج.. ومزغبات كشغل الطُبَّة
العاگرة!!
-جويليلي: علاش أمِّي كتبكي؟؟
-هنيَّة: لهلا يرحم فيك أبويا في هاد نهار شي عظم.. أنت هو سبابي حتَّى دخلت لدار هاد عدو الله نخدم.. ودار ما دار بلا ما يحشم.. ومن
بعد فرض على بو اختك رحيمو يتجوج بي..
-جويليلي: بو اختي رحيمو… هي بوها ما شي هو بويا؟؟؟
-هنيَّة: لاَّ أوليدي لاَّ.. ما بقى ما نخزن عليك.. بوك أنت هو الحاج بوعزَّة
-الجوقة: بو جويليلي هو الحاج بوعزَّة!! الحاج بوعزَّة هو بو جويليلي!!
-جويليلي: الحاج بوعزَّة هو بويا!! واهي أنا ماشي غ مكفيَّة عليَّ زگاوة.. أنا خص من عطيني الهراوة..
-حميدة: بويا تيگول ما شي بعيد وقدر.. حيت الحاج بوعزَّة غير دايز وگلف بحال الحلُّوف
-الحاج بوعزَّة: وانت سيري أهديك البوطالة.. طيحي باطلك على شي حد خر..
-هنيَّة: وزايد باغي تنكر ياك أ الكافر؟؟؟
-الحاج بوعزَّة: ياك گلت لك نهار اللَّوَّل طيحي بنادم؟؟؟؟
-هنيَّة: عييت ما نعشَّب.. وعييت ما نزعتر.. وعييت ما نزمَّر.. ولا بغى يطيح هداك القدر لمقدَّر..
-حميدة: وا لشاشرة.. وا عنداكم نكونو حتَّى حنا أولاد الحاج بوعزَّة من ضرار.. وما سايقين خبار؟؟؟
-الحاج بوعزَّة: إوا دبري راسك معاه داب..
-هنيَّة: ندبَّر راسي معاه.. هي ما غاديش دِّيرو ولدك؟؟؟
-الحاج بوعزَّة: ولدي!! هاك هاك على ولدي!! عندك شي شهود؟؟ عندك شي حجوج؟؟؟
-لمقدَّم: عندك شي شهود أهنيَّة؟؟ عندك شي حجوج؟؟؟ يالله جبديهم إلى عندك
-هنيَّة: حجوج!! بغيت الحجوج ياك؟؟؟ أنا غادية نعطيك الحجوج علاش تتبرِّي داب.. اليوم أنا لِّي غادية ندِّي عمرك بيدي يا ولد الحرام..
ونهنِّي الدَّوَّار من فعايلك..
(تأخذ السكين من يد عويشة، وتهجم على الحاج بوعزَّة، فتصيب لمقدَّم في بطنه. تختفي هاربة. يتبعها الاَّخرون، إلاَّ جويليلي وحميدة. تدفع عويشة المعطي. تسمع من الداخل أصوات متداخلة: لمقدَّم مات. وا ناري أش درت أهنيَّة؟ شدو الحرامية. شد.. شد. وانت طلقها خليها تهرب)
(22)
-لمقدَّم: الله ربِّي ضَّربة ماجات غَ فيَّ.. ناري هدي هي لَّخرى لي
(مقطع غنائي)
ياك أدوَّار الهم بهمَّك فاضت لگلوب
عيونك جارية بالدَّم حروفك ما حملتها كتوب
وا دوَّاري الحال مكرَّب
لحبل مسيَّب على ربعة
الوقت مگلَّب الحق منيَّب
بناب الكلب
ياك أدوَّار الهم بهمك فاضت لگلوب
***
دوَّار الهم بهمُّو فاضت لگلوب
عيونو جارية بالدَّم حروفو ما حملتها كتوب
الدَّوَّار مكرَّب لحبل مسيَّب
على ربعة الحق منيَّب
بناب الكلب ياك أدوَّاري
دوَّار الهم
***
دوَّار الهم حالو ديما مكروب
شتاتو نازلة بالسَّم حمامو رخى جناح لهروب
الدَّوَّار مگلَّب حالو ما يعجب
بكَّاتو دمعة الحق منيَّب
بناب الكلب ياك أدوَّاري
دوَّار الهم
(23)
-لمقدَّم: سندوني.. بغيت نموت واگف.. وجيبو لي عويشة نشوفها گبل ما نعگدهم.. بغيتها تكون آخر حاجة نشوفها في الدنيا.. صافي
ضبابة طاحت لي على عيني..
-حميدة: وقيلا هدا عزراين جاي بعجاجتو
-لمقدَّم: عزراين!! ناري عزراين لحگ.. وصِّيوا مَّالين الدَّار.. گولو لهم ويَّاكم.. ويَّاكم تسلفو من عند الحاج بوعزَّة.. وانت أحميدة ما
تنساش تعطيهم هديك الأمانة..
-حميدة: ولكن تا نگولها للحاج بوعزة بعدا أ لمقدَّم
-لمقدَّم: لاَّ..لاَّ.. الحاج بوعزَّة لاَّ.. ويَّاك تگولها له أحميدة.. أنا مزاوگ فيك
-جويليلي: شهَّد.. شهَّد أ الكافر بالله.. معَّرت واش غادية تنفعك هاد شهادة ولاَّ لاَّ؟
-لمقدَّم:أشهد أن لا إله.. كلشي من هديك لحمارة بنت لحمار.. كون جيت عليها غير بروميي ولاَّ بامور گع.. كلاَّ راني گع ما جيت لِّي
هنا.. وما طرا لي والو.. ناري ها مصارني خرجو..
-جويليلي وحميدة: ناري!! مصارنو خرجو!! (يختفيان)
-لمقدَّم: أشنو هاد الشِّي؟ الكوردة باش محزَّم.. هي الضَّربة جات غير في الكوردة.. أحْ الله باقي حي.. والله إلى باقي حي.. ونوض دگعَّد


أ لمقدَّم.. نوض ما عندك باس.. نوض فلت بجلدك.. را الوقت خسر. (يختفي)



(اِنتهـــت)
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://khachaba.mam9.com
 
مسرحية رايس ليلة 3
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتدى هوات الخشبة :: قسم تكوين الممتل :: منتدى النصوص المسرحية-
انتقل الى: